عقارات فور يو

يا ترى فكرت في ديكور المطبخ وإنت بتأجر شقتك؟


  • الناشر:
  • Category:
  • نُشر بتاريخ: يوليو 12, 2017
  • 236 total views, 1 views today


ايوه بالظبط زي ما قريت العنوان كده، يا ترى خططت ديكور المطبخ لشقتك هيكون عامل إزاي وإنت بتدوّر على شقة تأجرها. معظمنا لما بيجي يدوّر على شقة بيكون أكتر حاجة بنهتم بيها وبتفاصيلها هى مساحة الشقة، المنطقة، مستوى المعيشة هناك، هنشطبها إزاي، ويا ترى هتكفينا لو عدد أفراد الأسرة كبير وغيرها وغيرها كتير تفاصيل تانية الواحد بيكون مُهتم بيها جداً، لكن مفيش حد فكر قبل في المطبخ وهو بيأجر شقته. أكيد كلنا عارفين إن المطبخ مهم وإن لازم ست البيت تكون مستريحة فيه عشان كده في ناس كتير دلوقتي بتهتم بديكورات المطبخ وإنه يبقى أنيق، فـ عشان كده عقارات فور يو قررت إنها تتكلم معاكوا عن نوع من أنواع المطابخ بقى مُنتشر جداً الفترة الأخيرة وهو المطبخ المفتوح أو المطبخ الأمريكي

وإزاي ناخد بالنا من المساحات عشان صاحب الشقة ما يضحكش علينا. خلونا نشوف:

  • لو قررت إنك تعمل مطبخ أمريكاني في شقتك اللي هتأجرها، يبقى أكيد قبل ما تأجر إنت محتاج تعرف مساحة الشقة أد إيه وده لإن المطبخ الأمريكاني بيكون محتاج شقة واسعة زي مثلاً شقة دوبلكس أو فيلا. فبكده لو الشقة صغيرة فإنت مش هتعرف تعمل فيها المطبخ الأمريكاني اللي نفسك فيه،
  • كمان مُهم إنك تعرف إن المطبخ الأمريكاني بيكون محتاج مساحة واسعة أمامه واللي تقريباً بتكون متر ونص عشان تقدر تعمل “البار” بتاع المطبخ،
  • مش بس كده، كمان مُهم إنك تتأكد من إن عواميد الشقة ومواقعها مُناسبة لإنك تعمل مطبخ مفتوح لإنك ممكن بعد كل ده تلاقي إن فيه عمود من عواميد الشقة مكانه مش مُناسب وعائق بالنسبة لإنك تعمل مطبخ مفتوح.

أما لو هنتكلم عن النصائح أو الحاجات اللي المفروض تعملها بعد ما اخترت إنك تعمل مطبخ أمريكاني هو إن مُهم إنك تركب شفاط هواء فوق البوتجاز وده عشان تتخلص بسرعة من روائح الأكل. كمان لو خايف إن مش هيكون فيه مكان للتخزين في المطبخ المفتوح، فممكن تستخدم أرفف أو دواليب وتحطها فوق البار وبكده يبقى حليت المشكلة دي.

وأخيراً، المطبخ الأمريكي هو نوع من أنواع المطابخ اللي بقيت مُنتشرة جداً الفترة الأخيرة واللي كتير من الناس بتتجه ليه عشان شكله العصري الجميل. فالمطبخ وشكله من الأساسيات اللي كلنا المفروض ناخد بالنا منها وإحنا بنختار الشقة اللي هنأجرها.

236 total views, 1 views today

Related Posts